viernes, 25 de noviembre de 2016

CONVOCATORIA DE CONCENTRACIÓN VENRES 25 DE NOVEMBRO ÁS 20 H NO OBELISCO da Coruña

Mulleres organizadas na Coordinadora local da Marcha Mundial das Mulleres da Coruña convocamos á aconcentración para hoxe 25 de novembro, Día Internacional de loita contra a violencia machista,  ás 20 horas no Obelisco.

Traballamos durante todo o ano para visibilizar e denunciar as violencias machistas e transformar a sociedade para erradicalas. Con esa intención, representaremos unha performance que pretende identificar os distintos tipos de violencia que sofrimos as mulleres polo mero feito de selo.

Este 25N queremos lanzar unha mensaxe en tempos duros nos que as violencias se multiplican: A violencia machista non ten idade: erradiquémola. E queremos lembrar tamén que a violencia machista é contra todas e que as solucións son coletivas.

Un 25 de novembro máis de loita contra a violencia machista. Contra a violencia que sufrimos as mulleres polo feito de sermos mulleres. Van 17 anos desde que a Asemblea Xeral das Nacións Unidas designase o 25 de novembro como o Día Internacional da Eliminación da Violencia contra a Muller, e non nos cansamos, non esmorecemos ante os ataques daqueles que se senten ofendidos. Daqueles que deslixitimando o discurso feminista son cómplices de cada asasinato, de cada agresión, de cada violación. Porque non son feitos illados, noticias breves da sección de sucesos dos informativos, senón a consecuencia do sistema de valores que avala o dominio dun sexo que se afirma sobre outro que lle pertence.

“Cando agriden a unha nos agriden a todas” non é metafórico, xa que coas agresións preténdese que esteamos pasivas, inanes, temerosas, inseguras e coartar a nosa liberdade. Non. Berramos que a cada agresión levantan a nosa ira. O androcentrismo non vai seguir ocultando a nosa voz. Queremos que as regras de xogo non dependan de se nacemos nenas, nenos ou transxénero. Queremos vivir sen medo.

Seguiremos en marcha ata que TODAS sexamos libres!!

Este 25N, como o resto do ano, saimos ás rúas reclamar unha vida sen violencia.

Fronte a violencia machista, loita feminista!


No hay comentarios: