As mulleres dos 37 concellos que abrangue a Area Sanitaria da
Coruña só dispoñen dun centro para a atención especializada da súa saúde sexual
e reprodutiva, o COF de Orillamar, que ante este estado de saturación non só
tivo que deixar de realizar as revisións xinecolóxicas que viña facendo de
sempre, senón que sen incremento do seu cadro de persoal veu incrementada a súa
carga de traballo coa consecuente repercusión nos prazos de atención ás persoas
que a el acoden en busca de tratamento. A culpable desta situación é a política
de recortes do Sergas, a falta de recursos para os Centros de Orientación
Familiar (COF) e, de forma concreta, a supresión do COF do Ventorrillo, pola vía
de non substitución do persoal.
As mulleres dos 37 concellos que abrangue a Area Sanitaria da
Coruña só dispoñen dun centro para a atención especializada da súa saúde sexual
e reprodutiva, o COF de Orillamar.
En resposta, a Plataforma polo Dereito ao Aborto e a Plataforma
de Defensa da Sanidade Pública celebraron este xoves unha concentración, que
comezou na ponte que une o CHUAC co Tanatorio e que despois se desprazou até a
mesma esplanada do CHUAC, para denunciar os recortes na atención e protección
da saúde sexual e reprodutiva das mulleres e esixir "a inmediata cobertura
da praza de xinecoloxía e a de técnica en coidados auxiliares de enfermaría no
COF do Ventorrillo", para que este centro volva ofrecer as prestacións
anticonceptivas e as revisións xinecolóxicas.
As entidades convocantes lembraron que os Centros de Orientación
Familiar son os centros especializados e para moitas persoas o único servizo público
que presta atención en anticoncepción, prevención de cancro de colo de útero,
orientación da demanda de interrupción legal do embarazo e atención á problemática
psicosexual e de parella. E lembran que mesmo a situación precedente, con dous
centros para unha área sanitaria tan poboada e ampla, que chega mesmo até a
Costa da Morte, era "máis que insuficiente". "Nestas condicións,
a maior parte do tempo debe ser empregado en labores asistenciais, quedando
relegados a un segundo plano as dimensións de educación e promoción da saúde",
subliñan.
Dende que en xaneiro de 2013 se xubilaron o Xinecólogo e da Técnica
en Coidados Auxiliares de Enfermaría do COF do Ventorrillo, as 152 mil mulleres
en idade fértil da área da Coruña teñen como única alternativa o centro de Orillamar.
Para poder asumir este volume de traballo, denuncian, a xerencia desta área
sanitaria tomou a decisión de suprimir os exames de saúde xinecolóxicos que se
viñan facendo dende a súa apertura nestes centros e pasarlle esta prestación
aos centros de saúde. En opinión da Plataforma polo Dereito ao Aborto e da
Plataforma de Defensa da Sanidade Pública, "a xerencia demostra un
profundo descoñecemento da realidade xa que neste momento a maioría dos centros
de saúde non están en condicións de asumir máis presión asistencial, nin están
creados os recursos humanos e materiais para que poidan dar este tipo de atención
cun mínimo de calidade".
"A atención nesta materia é moito máis que a mera prescrición
de anticonceptivos hormonais e a realización de citoloxías, tal e como a actual
administración quere vender á cidadanía" sinalan, e engaden que "as
irresponsábeis e irreflexivas decisións desta xerencia demostran unha falta de
respecto pola saúde das mulleres, deixándonos nunha situación de indefensión
con perda de dereitos básicos e obrigándonos, sobre todo ás mulleres do medio
rural, a buscar solucións na sanidade privada". Conclúen que "as políticas
de recorte de dereitos básicos recaen máis especificamente sobre a saúde das
mulleres" e denuncian que "as actuais políticas reafirman unha única
identidade feminina asentada na maternidade, apropiándose de novo do corpo e da
sexualidade das mulleres, e facendo aínda maiores as desigualdades existentes
entre sexos".
No hay comentarios:
Publicar un comentario