lunes, 28 de diciembre de 2015
18 DE DECEMBRO DE 2015. Día Internacional das migracións e persoas migrantes
A Concellaría de Igualdade e Diversidade, con motivo
do Día Internacional das Migracións e das persoas migrantes, ten una lembraza
especial das persoas que este ano perderon a vida ou desapareceron mentres
trataban de chegar a outro destino en procura de oportunidades de vivir ao
amparo dos seus dereitos humanos.
Desde o ano 2000, o día 18 de decembro conmemórase o ‘Dia
Internacional das persoas migrantes’, é unha data para reivindicar os dereitos
de todas as persoas que se desprazan dos seus países de orixe e tamén para
denunciar as vulneracións dos mesmos, en base á adopción da Convención
Internacional sobre a protección dos dereitos das persoas traballadoras
migrantes e das suas familias pola Asemblea Xeral de Nacións Unidas (unha
Convención aínda pendente de firma por parte de España).
O Concello da Coruña súmase a esta conmemoración como
parte do seu compromiso político cun modelo de desenvolvemento centrado nas
persoas, os dereitos humanos e o principio da igualdade de xénero, ingredientes
necesarios para unha cidade inclusiva e acolledora en Igualdade. Ademais,
resulta imprescindible tomar en consideración que as relacións de xénero
determinan (e son determinadas por) cada paso do ciclo migratorio; e isto refírese
non só ás decisións tomadas nos fogares e núcleos de convivencia, senón tamén a
nivel comunitario e institucional.
Coa adhesión da Coruña á rede de ‘cidades-refuxio’ reafirmouse o compromiso político deste
goberno municipal coa necesidade de dar unha resposta institucional ante a
crise humanitaria que estamos a vivir e as situacións de extrema
vulnerabilidade que afectan a persoas migrantes e que, en certo sentido, agrávanse
como efecto das leis de estranxeiría españolas e a construción legal e social
que provoca de confrontación entre «inmigrantes irregulares» e «inmigrantes regulares». Tampouco axuda a falta de regulamento
da Lei de Asilo do 2009 ao provocar unha confusión permanente e unha demora
inxustificada na seguridade e
garantía xurídica de quen solicita asilo.
Neste sentido, o traballo que se realiza desde a
Concellería de Igualdade e Diversidade pretende cambiar a narrativa sobre a
migración, poñendo en valor a diversidade e as moitas maneiras nas que as persoas
migrantes contribúen a enriquecer os valores da cidade da Coruña, como
sociedade anfitriona.
Por todo iso, o 18 de Decembro de 2015 queremos
lembrar especialmente ás persoas que este ano perderon a vida ou desapareceron
mentres trataban de chegar a outro destino en procura de oportunidades de vivir
ao amparo dos seus dereitos humanos; e tamén hoxe facemos unha chamada á
cidadanía e institucións para que asuman como propios os obxectivos cos que
este goberno municipal xa se comprometeu:
- A protección dos Dereitos Humanos das persoas
migrantes, con especial atención
aos/ás menores.
- A necesidade de erradicar a explotación e trata de
quen ten que emigrar dos seus países de orixe.
- A importancia de reforzar as políticas de igualdade
e os dereitos das mulleres.
- O compromiso de fomentar a convivencia
intercultural desde o principio de igualdade na diversidade.
Suscribirse a:
Enviar comentarios (Atom)
No hay comentarios:
Publicar un comentario