viernes, 17 de marzo de 2017

A Coruña converterase "na capital da loita contra as violencias machistas" durante as xornadas 'Municipios cara á igualdade', que se celebrarán o 24 e 25 de marzo

A edil Rocío Fraga destaca a participación de representantes de oito concellos de todo o Estado “que destacan pola posta en marcha de políticas innovadoras cara á igualdade de xénero e que poñen en valor as diversidades”.

A concelleira de Igualdade e Diversidade, Rocío Fraga, presentou esta mañá as xornadas Municipios cara á igualdade: políticas transformativas para a igualdade de xénero, que se desenvolverán na Domus os días 24 e 25 de marzo. A iniciativa, vinculada ao programa de actividades do 8 de marzo, Mulleres que transforman realidades,  reunirá na cidade a representantes da área de igualdade de oito cidades do Estado e membros dos grupos municipais que gobernan estas localidades, como son Barcelona, Madrid, Valencia, Compostela, Fuenlabrada, Iruña, Vitoria-Gasteiz ou Castelló, "o que situará a cidade da Coruña no epicentro das políticas municipais encamiñadas á igualdade, atención ás diversidades e á erradicación das violencias machistas igualdade a nivel estatal", afirmou a edil.

"Para camiñar cara a unha sociedade igualitaria cómpre executar políticas desde a proximidade, que é onde temos capacidade os concellos", explicou a titular de Igualdade, "polo que estas xornadas, abertas á cidadanía, permitirán intercambiar experiencias que, desde o ámbito local, marcan unha tendencia de actuación para a consecución de obxectivos comúns que transcenden as competencias dos municipios". A este respecto, a concelleira destacou o traballo que se levará a cabo "non só con aquelas cidades coas que xa temos abertas moitas liñas de colaboración durante todo o ano, como son Barcelona, Compostela, Madrid ou Valencia, senón con todos aqueles municipios que poñen en práctica políticas innovadoras e prácticas con resultados positivos para crear cidades máis igualitarias e que poñen en valor as diversidades", e engadiu, neste sentido, que o Goberno local "sempre ten disposición e vontade de diálogo e de traballo con todas aquelas persoas e institucións que así desexen facelo".

"Un dos municipios que fará achegas nesta xornada, e que leva anos desenvolvendo políticas de xestión da diversidade, será Fuenlabrada", salientou Fraga, "berce do Programa PIPE, que desenvolve o Concello da Coruña a través da Policía Local cara a previr as identificacións con nesgo discriminatorio, e mellorar a eficacia deste corpo na súa loita contra os delitos de odio, así como impulsar a participación cidadá".

As xornadas, que porán sobre a mesa as políticas levadas a cabo tanto nos municipios participantes como pola área que dirixe Rocío Fraga, son de carácter aberto á cidadanía. "Esta Concellería, ao igual que o resto do Goberno local, pula pola participación da veciñanza á hora de elaborar as súas políticas", aseverou. Como mostra, a edil destacou o desenvolvemento do Pacto social por unha cidade libre de violencias machistas, "proxecto pioneiro" que actualmente se atopa na fase de encontros abertos á cidadanía "con grande éxito de asistencia", á vez que lembrou que esta tarde terá lugar unha nova xuntanza no Centro Cívico de San Diego, ás 19.00 horas.   

Así, durante a xornada do venres 24, que inaugurará o alcalde, Xulio Ferreiro, ás 10.00 horas, analizarase proxectos concretos levados a cabo polos concellos participantes coa finalidade de erradicar as violencias machistas nos seus municipios. En concreto, entre as propostas que se abordarán este día, a edil Rocío Fraga explicará o desenvolvemento do Pacto Social por Unha Cidade libre de Violencias Machistas. Tamén haberá tempo para abordar iniciativas que tiveron un especial impacto na poboación, como a campaña Concellos en negro, que se levou a cabo en 20 localidades galegas, entre elas A Coruña, ou Sanfermines contra as agresións sexuais nas festas de Iruña.

O sábado, 25 de marzo, o diálogo xirará arredor dos novos enfoques das políticas para atender ás diversas realidades e, entre elas, cobrarán importancia as liñas de traballo co colectivo LGTBQI, onde o Concello da Coruña exporá a posta en marcha do novo Espazo das Diversidades e Identidades de Xénero, inaugurado o pasado mes de decembro. Neste día, analizaranse cuestións como a corresponsabilidade cidadá para o empoderamento das mulleres, programas de saúde comunitaria ou o urbanismo, dentro da administración local, que atende ás diversidades. Durante as xornadas tamén se presentarán os resultados do traballo que realiza, nesta liña, a Universidade da Coruña, coa que o executivo coruñés ten asinado un convenio a través do Centro de Estudos de Xénero e Feministas (CEXEF), coa finalidade "de poñer en valor unha das institucións máis importantes desta cidade e pode facer numerosas achegas para mellorar as políticas públicas nesta e outras materias", especificou a responsable municipal. 

Finalmente, o encontro rematará cun roteiro feminista (17.00 horas), un percorrido urbano que se levará a cabo desde a Domus até a Praza de María Pita, co obxectivo de achegar unha reflexión sobre a adaptación dos elementos urbanos ás diferentes necesidades da vida cotiá. "Farase fincapé na diversidade de persoas que usan o espazo público, equipamentos, transporte así como na diversidade de experiencias e tarefas que teñen estas persoas", explicou Fraga, quen sinalou que a ruta tamén permitirá "visibilizar as mulleres e a súa historia nos espazos da cidade". As xornadas Municipios cara á igualdade: políticas transformativas para a igualdade de xénero son gratuítas, pero é necesario realizar a inscrición previa a través da páxina web municipal www.coruna.gal/igualdade: https://docs.google.com/forms/d/e/1FAIpQLSeyaRgSqInor1w2KoFFrUFvS3SxzjV5MdhmCD8TAFNEa_ygvw/viewform?c=0&w=1



No hay comentarios: